2Th 1 | KQC | STEP | Mina bi Paul, Silas, ma Timothy yaku bura reyafa — Ekalesia vene rofu Thessalonica ri, kaere bi uni Baba Sei di ma Warika Amiye Iesu Keriso di:

a 1.1:Acts 17.1

b 1.9:Is 2.10

2 Thessalonians 1

1 Mina bi Paul, Silas, ma Timothy yaku bura reyafa — ^a

Ekalesia vene rofu Thessalonica ri, kaere bi uni Baba Sei di ma Warika Amiye Iesu Keriso di:

2 Baba Sei ma Warika Amiye Iesu Keriso di buni toragade ma uka amuta bi ya vene sa.

Keriso dairi dego ri Sei yaku amiye rofu kota rego

3 Dubuiyaka, una yaku togatoga ya vene dada Sei rofu ni buni reyagadu. Makai resifa bi buni, ini adina bi ya vene di uka vari gira maradi ina rofu bi, tora nido ya kaya ya kaya rofu uka madedi yaku bi tora nido. 4 Mina dada una yaku Sei di ekalesia vene di nemokori ka ya rofu ni vasina resifa. Ya ni vasina resifa sana bi yomakai: esika tora ma toe tora moisi amededi idu, are rei gira resi bi yi mokena Sei rofu vari gira aisi amededi.

5 Mina vegu rededi yaku nido Sei di kota bi mokena rorobo resi makai esika moi amededi dada ini ourefeidena amena sana ideri amegedi. 6 Sei yaku vegu rama rego dada: Esika ya madedi vene rofu bi ina yaku esika mago. 7 Resi bi Sei yaku ya rofu, kaere bi gua esika moisa bi, ini vegu buni masi una rofu ka makai rego. Warika Amiye Iesu ini naivonaivo vima tau ma ita fairo sa oma gutu ogau nigedi di meda bi makai vata nigo. 8 Sei rofu gedu madedi vene rofu, ma uni Warika Amiye Iesu di ago buni de neidededi vene rofu ini obini toe tora iniye mago. 9 Ini obini bi yomakai: ina vene bi toga ameibona di esika kaunava mina mago ma Warika Amiye ma ini vava di vabara gutu resi ini nemokori nuga feidego. ^b 10 Ini mina dego medari, ini vene tau yaku ini vabara magedi ma ini mokena vari gira aiyadi vene yaku ini roka ni odoro regedi. Mina ya vene ka ina vene fogori are regedi adina ya niyafa ago bi yi mokena vari gira aiyadi.

11 Mina dada togatoga ya vene rofu usausa nisifa. Uni Sei usa nisifa, ina yaku ya vene di vegu moi buni reyainedi vegu buni ya raka niyo amegedi dada. Ina yaku yi vegu buni di ura tau ma uka vari gira mana di moimai vava dudu moi rama rigo. 12 Makai ida dudu bi uni Warika Amiye Iesu di roka ni odoro regedi ya vene dada, resi yi roka bi ni odoro rego ina dada, uni Sei ma Warika Amiye ^{▼▼1.12uni Sei ma Warika Amiye;bauni Sei Warika Amiye.} Iesu Keriso di buni toragade dudu.